phir rah-e-ishq wahi zad-e-safar mange hai waqt phir qalb-e-tapan deeda-e-tar mange hai

phir rah-e-ishq wahi zad-e-safar mange hai
waqt phir qalb-e-tapan deeda-e-tar mange hai

sajde maqbool nahin bargah-e-naz mein ab
astaan husn ka sajde nahin sar mange hai

kis ne pahuncha diya us hosh-ruba waadi mein
keh jahan wahshat-e-dil zad-e-safar mange hai

meri duniya ke taqazon hi pe mauqoof nahin
deen bhi ek naya fikr-o-nazar mange hai

ishq ko zawiya-e-deed badalna hoga
jalwa-e-husn naya zauq-e-nazar mange hai

sab ki aankhon se bacha kar jo kabhi laote they
waqt har chor se woh laal-o-gohar mange hai

deen o duniya ho keh ho ishq o hawas ay "saghar"
har koi khoon-e-jigar khoon-e-jigar mange hai

Saghar Siddiqui