Main Chaar Jumataan Ki Parhiya Main Fitwey Lawaan Har Ik Tey Kadey Be-Amlaan Tey Kadey Be-Aqlaan Tey

وارث شاہ
میں چار جماعتاں کی پڑھیاں
میں فتوے لاواں ہر اک تے
کدی بے عملاں تے
کدی بے عقلاں تے
کدی شاعری تے، کدی گاؤن تے
کدی ہسن تے کدی روون تے
میں فتوے لاواں ہر اک تے

میں آپ مسیتی جاواں ناں
جئے جاواں مَن ٹکاواں ناں
میں فتوے لاواں اوتھے وی
کدی وضو تے کدی نماز اتے
کدی اُچی نیویں آواز اتے
کدی مَنن یا نہ مَنن تے
ہتھ اُتے تھلے بنھن تے
میں فتوے لاواں ہر اک تے

کدی کافر آکھاں مولویاں نوں
میں فتوے لاواں ساریاں تے
کدی ٹوپی تے کدی داڑھی تے
گل چنگی یا گل ماڑی تے
کدی شہیداں تے کدی مریاں تے
کدی مناؤندے جمن ورھیاں تے
کدی جنگاں تے کدی جہاد اتے
میں فتوے لاواں ہر اک تے

کدی رسم آکھاں دین نوں
کدی دین آکھاں رسماں نوں
میں رَبّ، قرآن نوں من لیا
پر منیا چُکن قسماں نوں
کدی عیداں تے شبراتاں تے
کدی جاگن والیاں راتاں تے
کدی زیراں تے کدی زبران تے
کدی مزاراں تے کدی قبراں تے
میں فتوے لاواں ہر اک تے

میں سُنی،وہابی،حنفی ہویا
ہویا شافعی،مالکی، تےحنبلی
میں سب کجھ ہویا
پر ہویانہ مسلماں
میں چار کتاباں جوِپڑھیاں
اپنے علم دیاں لاواں تڑیاں

ویلا میرے علم دا ٹھوٹھا جے
ہر فتوٰی میرا جھوٹھا جے
میں آپ تاں فرض نبھاواں نہ
دین دے نیڑے جاواں نہ
پر کافر آکھاں ہر اک نوں
میں فتوے لاواں ہر اک نوں