Bad Dili Mein Beqarary Ko Qarar Aaya Tou Kia Ya Piyada Ho Ke Koi Shahsawar Aaya Tou Kia

بد دلی میں بیقراری کو قرار آیا تو کیا
پا پیادہ ہو کے کوئی شہسوار آیا تو کیا
Bad Dili Mein Beqarary Ko Qarar Aaya Tou Kia
Ya Piyada Ho Ke Koi Shahsawar Aaya Tou Kia
زندگی کی دھوپ میں مُرجھا گیا میرا شباب
اب بہار آئی تو کیا ابرِ بہار آیا تو کیا

میرے تیور بجھ گئے، میری نگاہیں جل گئیں
اب کوئی آئینہ رُو آئینہ دار آیا تو کیا

اب کہ جب جانانہ تم کو ہے سبھی پر اعتبار
اب تمہیں جانانہ مجھ پر اعتبار آیا تو کیا

اب مجھے خود اپنی بانہوں پر نہیں ہے اختیار
ہاتھ پھیلائے کوئی بے اختیار آیا تو کیا

وہ تو اب بھی خواب ہے، بیدار بینائی کا خواب
زندگی مَیں خواب میں اس کے گزار آیا تو کیا

ہم یہاں بیگانہ ہیں، سو ہم میں سے جونؔ ایلیا
کوئی جیت آیا یہاں اور کوئی ہار آیا تو کیا
جون ایلیا
Joun Elia