Jane Kis Ki Thi Khata Yaad Nahi Hum Hoe Kaise Juda Yaad Nahi

جانے کس کی تھی خطا یاد نہیں
ہم ہوئے کیسے جدا یاد نہیں
Jane Kis Ki Thi Khata Yaad Nahi
Hum Hoe Kaise Juda Yaad Nahi
ایک شعلہ سا اٹھا تھا دل میں
جانے کس کی تھی صدا یاد نہیں
ایک نغمہ سا سنا تھا میں نے
کون تھا شعلہ نوا یاد نہیں
روز دہراتے تھے افسانۂ دل
کس طرح بھول گیا یاد نہیں
اک فقط یاد ہے جانا ان کا
اور کچھ اس کے سوا یاد نہیں
تو مری جان تمنا تھی کبھی
اے مری جان وفا یاد نہیں
ہم بھی تھے تیری طرح آوارہ
کیا تجھے باد صبا یاد نہیں
ہم بھی تھے تیری نواؤں میں شریک
طائر نغمہ سرا یاد نہیں
حال دل کیسے تبسمؔ ہو بیاں
جانے کیا یاد ہے کیا یاد نہیں