Aas Hi Se Dil Mein Paida Zindagy Hone Lagi Shamma Jalny BhiNa Paai Roshni Hone Lagi

آس ہی سے دل میں پیدا زندگی ہونے لگی
شمع جلنے بھی نہ پائی روشنی ہونے لگی
Aas Hi Se Dil Mein Paida Zindagy Hone Lagi
Shamma Jalny BhiNa Paai Roshni Hone Lagi
انتہائے عشق ہے کیسی جفا، کیسا گلہ
اب تو ان کی ہر خوشی، اپنی خوشی ہونے لگی

روک، اپنا ہاتھ روک اب اے جنون جامہ در
حسن پردہ دار کی پردہ دری ہونے لگی

الجھی الجھی سانس، گھبرائی نظر، بہکے قدم
اے نگار مست، دنیا دوسری ہونے لگی

چاند میرا، کہکشاں میری، گل و غنچہ مرے
تم مرے ہونے لگے دنیا مری ہونے لگی

ڈوبے تارے، جھلملائی شمع، شبنم رو پڑی
انتظار صبح تھا لو صبح بھی ہونے لگی

سوز دل سے روشنی ہونے لگی دل میں نذیرؔ
عشق کی دنیا بھی دنیا حسن کی ہونے لگی
نذیرؔ بنارسی
Nazeer Banarasi