Tamam Zeest Humari Bhaly Nehal Na Ho Koi Toh Door Ho Aisa Keh Jo Mahal Na Ho

تمام زیست ہماری بھلے نہال نہ ہو
کوئی تو دور ہو ایسا کہ جو محال نہ ہو
Tamam Zeest Humari Bhaly Nehal Na Ho
Koi Toh Door Ho Aisa Keh Jo Mahal Na Ho
دعا یہ کر، نہ کوئی زندگی میں ایسا ملے
جو ہمسفر تو رہے اور ہم خیال نہ ہو

مری بلا سے وہ دل کے قریں رہے، نہ رہے
جو ہمنشیں تو رہے آشنائے حال نہ ہو

لے اتنا رخت ِسفر کہ سفر بھی کٹ جائے
اور اس کا بوجھ ترے واسطے وبال نہ ہو

سفر میں اتنی ہی رفتار رکھ کہ آخرکار
پہنچ کے تو سرِ منزل کہیں نڈھال نہ ہو

عمل وہ کر کہ ندامت نہ جس پہ ہو تجھ کو
وہ بات کہہ کہ تجھے بعد میں ملال نہ ہو

خدا مقام اگر دے تو بس وہ اتنا ہی
کہ جس کے بعد مقدر میں پھر زوال نہ ہو

مری تلاش کا محور ہے اک رفیق جسے
محبتوں کے سفر میں کوئی سوال نہ ہو

سہا نہ جائے گا اس سے فراق کا موسم
دعا ہے، میرا یہ ایماں فقط خیال نہ ہو
شگفتہ نعیم ہاشمی
Shagufta Naeem Hashimi