Latest Post
Loading...

Meda Ishq vi Tuun,Meda Yaar Vi Tuun Meda Deen Vi Tuun,Emaan Vi Tuun


اہل ذوق کی نظر
دیوان فرید
حضرت خواجہ غلام فرید
میڈا عشق وی تُوں، میڈا یار وی تُوں
میڈا دین وی تُوں، ایمان وی تُوں۔
میڈا جسم وی تُوں، میڈا روح وی تُوں
میڈا قلب وی تُوں، جند جان وی تُوں۔
میڈا کعبہ قبلہ مسجد منبر۔ 
مصحف تے قرآن وی تُوں۔
میڈے فرض فریضے حج زکاتاں۔
صوم صلات اذان وی تُوں۔
میڈی زہد عبادت طاعت تقویٰ۔
علم وی تُوں، عرفان وی تُوں۔
میڈا ذکر وی تُوں، میڈا فکر وی تُوں۔
میڈا ذوق وی تُوں وجدان وی تُوں۔
میڈا سانول مٹھڑا شام سلوُنا۔ 
من موہن جانان وی تُوں۔
میڈا مرشد ہادی پیر طریقت۔ 
شیخ حقایق دان وی تُوں۔
میڈا آس امید تے کھٹیا وٹّیا۔
تکیہ مان تران وی تُوں۔
میڈا دھرم وی تُوں میڈا بھرم وی تُوں
میڈا شرم وی تُوں میڈا شان وی تُوں
میڈا دکھ سکھ روون کھلن وی تُوں۔
میڈا درد وی تُوں درمان وی تُوں۔
میڈا خوشیاں دا اسباب وی تُوں۔
میڈے سُولاں دا سامان وی تُوں۔ 
میڈا حسن تے بھاگ سہاگ وی تُوں
میڈا بخت تے نام نشان وی تُوں۔
میڈا دیکھن بھالن جاچن جُوچن۔ 
سمجھن جان سنجان وی تُوں۔
میڈے ٹھڈرے ساہ تے مونجھ منجھاری
ہنجواں دا طوفان وی تُوں۔
میڈے تلک تلولے سیندھاں مانگاں۔
ناز نہورے تان وی تُوں۔
مینڈی مہندی کجّل مُساگ وی تُوں۔
میڈی سرخی بیڑا پان وی تُوں۔
میڈی وحشت جوش جنون وی تُوں۔
میڈا گریہ آہ فغان وی تُوں۔
میڈا شعر عروض قوافی تُوں۔
میڈا بحر وی تُوں اوزان وی تُوں۔
میڈا اوّل آخر اندر باہر۔
ظاہر تے پنہان وی تُوں۔
میڈا فردا تے دیروز وی تُوں۔ 
الیوم وی تُوں الآن وی تُوں۔
میڈا بادل برکھا کھمنیاں گاجاں۔ 
بارش تے باران وی تُوں۔
 تھلڑا۔
 روہی چولستان وی تُوں
جے یار فرید قبول کرے۔
 سرکار وی تُوں، سلطان وی تُوں۔ 
نہ تاں کہتر کمتر احقر ادنیٰ۔
لاشئے لا امکان وی تُوں۔

0 comments:

Post a Comment

 
Toggle Footer