Latest Post
Loading...

Urdu Hai Mera Naam Mein 'Khusro' Ki Pahaili Mein 'Meer' Ki Hamraaz Hon 'Ghalib' Ki Sahaili


Ek NAZM "Urdu Zubaan" Ahl-E-Zauq Ki Nazar

Urdu Hai Mera Naam Mein 'Khusro' Ki Pahaili

Mein 'Meer' Ki Hamraaz Hon 'Ghalib' Ki Sahaili

Daccan Ke 'Vali' Ne Mujhe Godi Mein Khilaaya

'Sauda' Ke Qaseedon Ne Mera Husn Barrhaya

Hai 'Meer' Ki Azmat Keh Mujhe Chalna Sikhaaya

Mein 'Daagh' Ke Aangan Mein Khili Ban Ke Chambeli

Urdu Hai Mera Naam Mein 'Khusro' Ki Pahaili

'Ghalib' Ne Bulandi Ka Safar Mujh Ko Sikhaaya

'Hali' Ne Murawwat Ka Sabaq Yaad Dilaaya

'Iqbal' Ne Aaina-E-Haq Mujh Ko Dikhaaya

'Momin' Ne Sajaaye Merey Khwaabon Ki Haveli

Urdu Hai Mera Naam Mein Khusro Ki Pahaili

Hai 'Zauq' Ki Azmat Keh Diye Mujh Ko Sahaare

'Chakbast' Ki Ulfat Ne Merey Khwaab Sanwaanre

'Fani' Ne Sajaaye Meri Palkon Pe Sitaarey

'Akbar' Ne Rachaayi Meri Be-Rang Hathaili

Urdu Hai Mera Naam Mein Hun 'Khusro' Ki Pahaili

Kyun Mujh Ko Banaate Ho Ta'assub Ka Nishaana???

 Mein Ne Toh Kabhi Khud Ko Musalmaan Nahin Maana

 Dekha Tha Kabhi Mein Ne Bhi Khushiyon Ka Zamaana

 Apney Hi Watan Mein Hun Magar Aaj Akaili

 Urdu Hai Mera Naam Mein 'Khusro' Ki Pahaili


0 comments:

Post a Comment

 
Toggle Footer