us ko juda hue bhi zamana bahut hua ab kya kahen ye qissa purana bahut hua

us ko juda hue bhi zamana bahut hua
ab kya kahen ye qissa purana bahut hua

Dhalati na thi kisi bhi jatan se shab-e-firaq
ai marg-e-nagahan tera ana bahut hua

ham Khuld se nikal to gaye hain par ai Khuda
itane se vaqaye ka fasana bahut hua

ab ham hain aur sare zamane ki dushmani
us se zara rabt badhana bahut hua

ab kyon na zindagi pe muhabbat ko waar den
is ashiqi mein jan se jana bahut hua

ab tak to dil ka dil se tarruf na ho saka
mana ki us se milna milana bahut hua

kya kya na ham Kharab hue hain magar ye dil
ai yad-e-yar tera Thikana bahut hua

kahata tha naseehon se mere muunh na aiio
phir kya tha ek hoo ka bahana bahut hua

lo phir tere labon pe usi bewafa ka zikr
ahmad Faraz tujh se kaha na,bahut hua