Be-Chad Ke Tujh Se Mayassar Hoe Wisal Ke Din Hain Tere Khuwaab Ki Ratein Tere Khayal Ke Din (Mohsin Bhopali)

Be-Chad Ke Tujh Se Mayassar Hoe Wisal Ke Din
Hain Tere Khuwaab Ki Ratein Tere Khayal Ke Din

Firaq-e-Jaan Ka Zamana Guzarna Hoga
Fughan Se Kam Tou Na Honge Ye Mah-o-Saal Ke Din

Har Ik Amal Ka Woh Kia Kia Jawaaz Rakhta Hai
Na Ban Padega Jawaab Aik Bhi Sawaal Ke Din

Urooj-e-Bakht Mubarak Magar Ye Dhyan Rahe
Inhi Dinon Ke Ta'aqub Mein Hain Zawaal Ke Din

Guzar Rahe Hain Kuch Is Tarah Roz-o-Shab Apne
Keh Jis Tarah Se Katen Shakh-e-Be-Nihal Ke Din

Shikayaten Bhi Buhat Hain Hikayaten Bhi Buhat
Guzar Na Jaen Yunhi Ahd-e-Be-Misaal Ke Din

Woh Zindagi Ko Naya Mod De Gaya "Mohsin"
Yahi Zawaal Ke Din Hain Mere Kamaal Ke Din 

 

Poet:Mohsin Bhopali