Jawani , Zindagani Hai , Na Tum Samjhe Na Hum Samjhe Ye Ik Aisi Kahani Hai , Na Tum Samjhe Na Hum Samjhe

جوانی ،زندگانی ہے، نہ تم سمجھے نہ ہم سمجھے
یہ اک ایسی کہانی ہے، نہ تم سمجھے نہ ہم سمجھے

ہمارے اور تمہارے واسطے میں اک نیا پن تھا
مگر دنیا پرانی ہے، نہ تم سمجھے نہ ہم سمجھے

محبت ہم نے تم نے ایک وقتی چیز سمجھی تھی
محبت جاودانی ہے، نہ تم سمجھے نہ ہم سمجھے

گزاری ہے جوانی روٹھنے میں اور منانے میں
گھڑی بھر کی جوانی ہے، نہ تم سمجھے نہ ہم سمجھے

ادائے کم نگاہی نے کیا رسوا محبت کو
یہ کس کی مہربانی ہے، نہ تم سمجھے نہ ہم سمجھے

عیاں کر دی ہر اک پر ہم نے اپنی داستانِ دل
یہ کس کس سے چھپانی ہے، نہ تم سمجھے نہ ہم سمجھے

جہاں دو دل ملے دنیا نے کانٹے بو دئیے اکثر
یہی سب کی کہانی ہے، نہ تم سمجھے نہ ہم سمجھے

متاعِ حسن و الفت پر یقیں کتنا تھا دونوں کو
یہاں ہر چیز فانی ہے، نہ تم سمجھے نہ ہم سمجھے

صبا اکبر آبادی