گرچہ کم کم تری تصویر نظر آتی ہے
سات رنگوں کی صدا آٹھ پہَر آتی ہے
شاعری نامی پرندے کے ذریعے مجھ تک
کتنے نادیدہ زمانوں کی خبر آتی ہے
فیصلہ کرلے کہ ہے کون زیادہ حسّاس
تُجھ کو آتی ہے مہک، مجھ کو نظر آتی ہے
کون فنکار سنبھالے وہاں مصرعے کی لچک ؟
قافیہ بن کے جہاں تیری کمر آتی ہے
شعر تو بعد میں ہم سُنتے سُناتے رہیں گے
پہلے بتلا، تُجھے تعظیمِ ہُنر آتی ہے ؟
اور کیا آئے گا ہم اہلِ محبت پہ عذاب ؟
ہاں قیامت ہے، سو آنے دو اگر آتی ہے
سوچتا ہوں کہ گلی والے گُلوں کی خوشبو
کیسے در کھولے بِنا صحن میں در آتی ہے ؟
راستہ لاکھ مُقفّل ہو گلے سے لب تک
چیخ تو چیخ ہے، چُپکے سے گزر آتی ہے
ایسا خودکار ہے فارس مِرے اشکوں کا نظام
خالی ہوتی ہے مِری آنکھ تو بھر آتی ہے
رحمان فارس
Garchey Kam Kam Teri Tasweer Nazar Aati Hai
Saat Rangon Ki Sadaa Aath Pehar Aati Hai
Shaairi Naami Parindey K Zariey Mujh Tak
Kitney Naa-deeda Zamaanon Ki Khabar Aati Hai
Faisla Kar Ley K Hai Kon Zyaada Hassaas
Tujh Ko Aati Hai Mehek, Mujh Ko Nazar Aati Hai
Kon Fankaar Sanbhaaley Wahaan Misrey Ki Lachak ?
Qaafiya Ban K Jahaan Teri Kamar Aati Hai
Sher To Baad Mein Ham Suntey Sunaatey Rahein Gey
Pehley Batla, Tujhey Taazeem-e-Hunar Aati Hai ?
Aur Kya Aaey Ga Ham Ehl-e-Muhabbat Pe Azaab
Haan Qyaamat Hai, So Aaney Do Agar Aati Hai
Sochta Hoon K Galee Waley Gulon Ki Khushboo
Kaisey Dar Kholey Bina Sehn Mein Dar Aati Hai ?
Raasta Laakh Muqfal Ho Galey Se Lab Tak
Cheekh To Cheekh Hai, Chupkey Se Guzar Aati Hai
Aisa Khud-kaar Hai Faris Merey Ashkon Ka Nizaam
Khaali Hoti Hai Meri Aankh To Bhar Aati Hai
Rehman Faris
No comments:
Post a Comment