Pur Kaif Baharon Ne Bhi Dil Tod Diya Hai Haan Unke Nazaron Ne Bhi Dil Tod Diya Hai

پر کیف بہاروں نے بھی دل توڑ دیا ہے
ہاں ان کے نظاروں نے بھی دل توڑ دیا ہے
طوفان کا شیوہ تو ہے کشتی کو ڈبونا
خاموش کناروں نے بھی دل توڑ دیا ہے
اس ڈوبتے سورج سے تو امید ہی کیا تھی
ہنس ہنس کے ستاروں نے بھی دل توڑ دیا ہے
کس طرح کریں تجھ سے گلہ تیرے ستم کا
مدہوش اشاروں نے بھی دل توڑ دیا ہے
مانا کہ تھی غمگین کلی خوف خزاں سے
چپ رہ کے بہاروں نے بھی دل توڑ دیا ہے
اغیار کا شکوہ نہیں اس عہد ہوس میں
اک عمر کے یاروں نے بھی دل توڑ دیا ہے
یہ دور محبت بھی عجب دور ہے اس میں
اے نقشؔ سہاروں نے بھی دل توڑ دیا ہے