Rahzan Aadmi Rahnuma Aadmi Barhaa Ban Chuka Hai Khuda Aadmi

Rahzan Aadmi Rahnuma Aadmi
Barhaa Ban Chuka Hai Khuda Aadmi

Haaye Takhleeq Ki Kar Pardaziyan
Khaak See Cheez Ko Keh Diya Aadmi

Khul Gaye Jannaton Ke Wahan Zaaechay
Do Qadam Jhoom Ke Jab Chala Aadmi

Zindagi Khanqah e Shahood o Baqa
Aur Loh e Mazar e Fana Aadmi

Subah Chand Ki Rukhsati Ka Samaan
Jis Tarah Bahar Mein Doobta Aadmi

Kuch Fareshton Ki Taqdees Ke Wastay
Seh Gaya Aadmi Ki Jafa Aadmi

Goonjti Hi Rahegi Falak Dar Falak
Hai Maseeyat Ki Aisi Sada Aadmi

Aas Ki Mooratein Poojty Poojty
Aik Tasweer See Ban Gaya Aadmi

 
Poet:Saghar Siddiqui
Kulyat e Saghar
Page No 243-244