Maa Pe Chaday Sajan Chaday Chadiya Pariya Vaida Aa Pardesaan Dere Laaye , Tuun Kam Ae Keeta Keda

پنجابی کلام بقلم خرم سہیل
ماں پے چھڈے سجن چھڈے چھڈیا پریا ویڑا
آ پردیساں ڈیرے لائے، توں کم اے کیتا کیڑا
دو ٹیماں دی روٹی لبھدی، لیند سکھ دا ساہ
ہسدے وسدے لنگھ جاندی، کوئی نہ ہوندا چیڑا
ماں پے روون ہتھ دھر دویں، یاد کرن ہر ویلے
آپ توں ایتھے موجاں ماریں، کر کے سنجا ویڑا
آساں رکھیاں، منتاں منیاں جا جا ہور دوارے
گل نہ کیتی نال تو اس دے، رب اے سب دا چیڑا
وا نصیبا تیریاں گلاں عقل میری نہ پئیاں
پٹھا وی سدھا لوکاں دا، ساڈا سدھا ٹیڑھا
 گُن کہ رکھ دیندے نیں ایتھے دنیا دار سیانے
کادی تینوں آکڑ بندیا،  توں مٹی دا پیڑا
ہتھ جپھے توں پائی ہر شے جتھے لگیا دا
آواز اجل دی پئی جے کنے، ملیا قبر دا ویڑا
ِمت کوئی نہیں سہیل کسے دا پلے بن اے گل
 جند دی ناہ نوں پا رب رستے، پار ہوئے تیرا بیڑا