Sab chiraghon ki hidayat ka matlab samjhe Chaand rootha to siyah rat ka matlab samjhe

سب چراغوں کی ہدایات کا مطلب سمجھے
چاند روٹھا تو سیہ رات کا مطلب سمجھے 

Sab chiraghon ki hidayat ka matlab samjhe
Chaand rootha to siyah rat ka matlab samjhe

اس پہ اترے تھے محبت کے صحیفے لیکن
ایک کافر کہاں تورات کا مطلب سمجھے 

Us pe utre thay muhabbat ke saheefe lekin
Aik kafir kahan Taurat ka matlab samjhe

 
کون رہ رہ کے وفاؤں کو نبھانا سیکھے
کون فرسودہ روایات کا مطلب سمجھے 

Kaun reh reh ke wafaon ko nibhana seekhe
Kaun farsudah rivayat ka matlab samjhe

 
اس سے پہلے تو دعاؤں پہ یقیں تھا کم کم
تو نے چھوڑا تو مناجات کا مطلب سمجھے 

Is se pehle to duaon pe yaqeen tha kam kam
Tu ne chhoda to munajat ka matlab samjhe

 
جب وہ بھر بھر کے لٹاتا رہا اوروں پہ خلوص
ہم تہی دست عنایات کا مطلب سمجھے 

Jab wo bhar bhar ke lutata raha auron pe khuloos
Hum tehi dast inayat ka matlab samjhe

 
اب کسی اور طرف بات گھمانے والے
میں سمجھتی ہوں تری بات کا مطلب، سمجھے 

Ab kisi aur taraf bat ghhumane wale
Main samajhti hoon teri bat ka matlab, samjhe

 
تجھ کو بھی چھوڑ کے جائے ترا اپنا کوئی
تو بھی اک روز مکافات کا مطلب سمجھے

Tujh ko bhi chhod ke jaye tera apna koi
Tu bhi ek roz mukafat ka matlab samjhe
کومل جوئیہ
Komal Juyia