Kisi Khayal Ki Soorat Mein Ab Guman Se Nikal Sukhan Ka Teer Hai Tou Hont Ki Kaman Se Nikal

کسی خیال کی صورت میں اب گماں سے نکل
سخن کا تِیر ہے تو ہونٹ کی کماں سے نکل

کبھی تو مجھ کو مرے عکس تک رسائی دے
اے آئینے تو کسی روز درمیاں سے نکل

چھپے ہوئے کوئی منظر مری نگاہ میں آ
اے کوئی ان کہے مصرعے، مری زباں سے نکل

ترے سوا بھی بہت لوگ منتظر ہیں مرے
سو اپنی چوٹ لگا اور داستاں سے نکل

مرے نصیب کے تارے، کہیں فضاؤں میں مل
میں چل پڑا ہوں زمیں سے، تو آسماں سے نکل
عزم الحسنین عزمی