Kia kahoon hum nafs, udasi hai Hasil e ishq bas udasi hai

کیا کہوں ہم نَفَس، اُداسی ہے
حاصلِ عشق بس اُداسی ہے
Kia kahoon hum nafs, udasi hai
Hasil e ishq bas udasi hai

میرے ہم رقص، سوز ہے مفقود
اے مرے ہم قَفَس، اُداسی ہے
Mere hum raqs soz hai mafqood
Ay mere hum qafas udasi hai

نوچ ڈالے گی میرے سینے کو
اس قَدَر پُر ہَوَس اُداسی ہے
Noch daale gi mere seene ko
Is qadar pur hawis udasi hai

یعنی تم لوٹ کر نہ آؤ گے
یعنی اب سو بَرَس اُداسی ہے
Yani tum laut kar na aao ge
Yani ab sau baras udasi hai

اب سیاہی ہے میرے رنگوں میں
اب مرا کینوس اُداسی ہے
Ab siyahi hai mere rangon mein
Ab mera canvas udasi hai

اک مسافر کہ ہے مجسم دکھ
اور صدائے جَرَس اُداسی ہے
Ek musafir ke hai mujassim dukh
Aur sadaa e jaras udasi hai

غم غلط کر مرا سلیقے سے
یار اک بار ہنس، اُداسی ہے
Gham ghalat kar mera saleeqe se
Yar ek baar hans udasi hai