Apne ghar ki khhirki se main asman ko dekhoon ga Jis par tera naam likhha hai, us tare ko dhoondoon ga

‏اپنے گھر کی کھڑکی سے میں آسمان کو دیکھوں گا
جس پر تیرا نام لکھا ہے، اُس تارے کو ڈھونڈوں گا
Apne ghar ki khhirki se main asman ko dekhoon ga
Jis par tera naam likhha hai, us tare ko dhoondoon ga

 
تم بھی ہر شب دیا جلا کر پلکوں کی دہلیز پہ رکھنا
میں بھی روز اک خواب تمہارے شہر کی جانب بھیجوں گا
Tum bhi har shab diya jalaa kar palkon ki dehleez pe rakhna
Main bhi roz ek khwab tumhare shehr ki janib bhejoon ga

 
ہجر کے دریا میں تم پڑھنا لہروں کی تحریریں بھی
پانی کی ہر سطر پہ میں کچھ دل کی باتیں لکھوں گا
Hijr ke dariya mein tum parhna lehron ki tehreeren bhi
Pani ki har siter pe main kuch dil ki baten likhhoon ga

 
جس تنہا سے پیڑ کے نیچے ہم بارش میں بھیگے تھے
تم بھی اُس کو چھو کے گزرنا، میں بھی اُس سے لپٹوں گا
Jis tanha se per ke neeche hum barish mein bheege thay
Tum bhi us ko chhu ke guzarna, main bhi us se liptoon ga

 
خواب مسافر لمحوں کے ہیں ساتھ کہاں تک جائیں گے
تم نے بالکل ٹھیک کہا ہے، میں بھی اب کچھ سوچوں گا
Khwab musafir lamhon ke hain sath kahan tak jayen ge
Tum ne bilkul theek kaha hai, main bhi ab kuch sochoon ga

 
بادل اوڑھ کے گزروں گا میں تیرے گھر کے آنگن سے
قوسِ قزح کے سب رنگوں میں تجھ کو بھیگا دیکھوں گا
Baadal orh ke guzroon ga main tere ghar ke angan se
Qaus e qazah ke sab rangon mein tujh ko bheega dekhoon ga

 
رات گئے جب چاند ستارے لُکن میٹی کھیلیں گے
آدھی نیند کا سپنا بن کر میں بھی تم کو چھو لوں گا
Rat gaye jab chaand sitare lukkan meeti khhelen ge
Adhi neend ka sapna ban kar main bhi tum ko chhu loon ga

 
بے موسم بارش کی صورت دیر تلک اور دُور تلک
تیرے دیارِ حسن پہ میں بھی کِن مِن کِن مِن برسوں گا
Be mausam barish ki soorat der talak aur door talak
Tere diyar e husn pe main bhi kin min kin min barsoon ga

 
شرم سے دوہرا ہو جائے گا کان پڑا وہ بُندہ بھی
بادِ صبا کے لہجے میں اِک بات میں ایسی پوچھوں گا
Sharm se duhra ho jaye ga kan para wo bunda bhi
Baad e saba ke lehje mein ek bat main aisi poochhoon ga

 
وقت کے اِک کنکر نے جس کو عکسوں میں تقسیم کیا
آبِ رواں میں کیسے امجدؔ اب وہ چہرہ جوڑوں گا
Waqt ke ek kanker ne jis ko akson mein taqseem kiya
Aab e ravan mein kaise Amjad ab wo chehra joroon ga

 
امجد اسلام امجدؔ
Amjad Islam Amjad