Tishnagi Aankhon Mein Aur Darya Khayalon Mein Rahe Hum Nawa Gar Khush Rahe Jaise Bhi Halon Mein Rahe

تشنگی آنکھوں میں اور دریا خیالوں میں رہے
ہم نوا گر خوش رہے جیسے بھی حالوں میں رہے
Tishnagi Aankhon Mein Aur Darya Khayalon Mein Rahe
Hum Nawa Gar Khush Rahe Jaise Bhi Halon Mein Rahe
اس قدر دنیا کے دکھ اے خوبصورت زندگی
جس طرح تتلی کوئی مکڑی کے جالوں میں‌رہے

دیکھنا اے راہ نوردِ شوق کوئے یار تک
کچھ نہ کچھ رنگِ حنا پاؤں کے چھالوں میں رہے

ہم سے کیوں مانگے حسابِ جاں کوئی جب عمر بھر
کون ہیں، کیا ہیں، کہاں ہیں، ان سوالوں میں رہے

بدظنی ایسی کہ غیروں کی وفا بھی کھوٹ تھی
سوئے ظن ایسا کہ ہم اپنوں‌ کی چالوں میں رہے

ایک دنیا کو مری دیوانگی خوش آ گئی
یار مکتب کی کتابوں کے حوالوں میں رہے

عشق میں دنیا گنوائی ہے، نہ جاں دی ہے فرازؔ
پھر بھی ہم اہل محبت کی مثالوں میں رہے
احمد فرازؔ
Ahmad Faraz