Has ke jindri enj handaiy kandeyan naal Zakhman di tasveer banaiy kandeyan naal

ہس کے جندڑی انج ہنڈائی کنڈیاں نال
زخماں دی تصویر بنائی کنڈیاں نال
Has ke jindri enj handaiy kandeyan naal
Zakhman di tasveer banaiy kandeyan naal

روندا سی تے پھلاں اتے لکھدا سی
نام کسے دا اک شیدائی کنڈیاں نال
Ronda si te phullan utte likhhda si
Naam kise da ek shadaiy kandeyan naal

جھٹ دا جھٹ ای سنگت مانی پھلاں دی
باقی دی میں فیر نبھائی کنڈیاں نال
Jhut da jhut ei sangat mani phullan di
Baqi di main fer nibhaiy kandeyan naal

ویکھیں کل نوں دتے ہوئے پھلاں دے
پھٹ نہ کرنے پین سلائی کنڈیاں نال
Wekhheen kal nu ditte hoay phullan de
Phat na karne pain silaiy kandeyan naal

پھلاں کول میں ستاں ساں تے ڈردا ساں
پر اوہ جیہڑی نیندر آئی کنڈیاں نال
Phullan kol main suttaan saan te darda saan
Par o jehri neender aiy kandeyan naal

ہاسے دے وچ ادھڑ گئے اس جسے دی
رو رو کیتی فر ترپائی کنڈیاں نال
Hase de vich udhar gaye is jusse di
Ro ro keeti fir turpaiy kandeyan naal

دنیا ڈھل ڈھل پیندی سی جد پھلاں تے
میں اک فوٹو چا بنوائی کنڈیاں نال
Duniya dhul dhul paindi si jad phullan te
Main ek photo cha banwaiy kandeyan naal

فر جیون دی ساری چادر چھجدی گئی
ہاسے دے وچ یار اڑائی کنڈیاں نال
Fir jeevan di sari chadar chhijdi gaiy
Hase de vich yar araiy kandeyan naal

واہ واہ مالی صدقے تیری حکمت دے
پھل وی لیندے نیں انگڑائی کنڈیاں نال
Wah wah Maali sadqe Teri himmat de
Phul vi lainde ne angraiy kandeyan naal

پھلاں کولوں ایناں ڈریا ہویا ساں
وکھری اک جاگیر وسائی کنڈیاں نال
Phullan kolon aina dareya hoya saan
Wakhhri ek jageer wasaiy kandeyan naal

انج تے لوکاں پھلاں نال نبھائی نئیں
جسراں احمد ویکھ نبھائی کنڈیاں نال
Enj te lokan phullan naal nibhaiy nai
Jisran Ahmed wekhh nibhaiy kandeyan naal

بے وسی دی حد نہیں مک گئی احمد جی
اج اک تتلی میں دفنائی کنڈیاں نال
Be vasi di had nai muk gaiy Ahmed ji
Aj ek titli main dafnaiy kandeyan naal

علی احمد گجراتی
Ali Ahmed Gujrati