Hum Thay , Humare Saath Koi Teesra Na Tha Aisa Haseen Din Kahein Daikha Suna Na Tha

ہم تھے، ہمارے ساتھ کوئی تیسرا نہ تھا
ایسا حَسین دِن کہیں دیکھا سُنا نہ تھا
Hum Thay , Humare Saath Koi Teesra Na Tha
Aisa Haseen Din Kahein Daikha Suna Na Tha
آنکھوں میں اُس کی تیر رہے تھے حَیا کے رَنگ
پَلکیں اُٹھا کے میری طرف دیکھتا نہ تھا

کُچھ ایسے اُس کی جِھیل سی آنکھیں تھیں ہر طرف
ہم کو سِوائے ڈُوبنے کے راستہ نہ تھا

ہاتھوں میں دیر تک کوئی خُوشبو بَسی رہی
دروازۂ چمن تھا وہ بندِ قَبا نہ تھا

اُس کے تو اَنگ اَنگ میں جَلنے لگے دِیئے
جادُو ہے میرے ہاتھ میں، مُجھ کو پتہ نہ تھا

اُس کے بَدن کی لَو سے تھی کمرے میں رَوشنی
کِھڑکی میں چاند طاق میں کوئی دِیا نہ تھا

کل رات وہ نگار ہوا ایسا مُلتفِت
عَکسوں کے درمیان کوئی آئینہ نہ تھا

سانسوں میں تھے گُلاب تو، ہونٹوں پہ چاندنی
اِن منظروں سے میں تو کبھی آشنا نہ تھا

رویا کچھ اِس طرح میرے شانے سے لگ کے وہ
ایسے لگا کہ جیسے کبھی بیوفا نہ تھا

ہے عِشق ایک روگ، مُحبّت عَذاب ہے
اِک روز یہ خراب کریں گے کہا نہ تھا

امجدؔ ہھاں پہ حَد کوئی رَہتی بھی کِس طرح
رُکنے کو کہہ رہا تھا مگر روکتا نہ تھا
اَمجد اِسلام امجدؔ
Amjid Islam Amjid