Yahi Nahi Keh Mera Dil Hi Mere Bas Main Na Tha Jo Tu Mila Toh Main Khud Apni Dastras Mein Na Tha

یہی نہیں کہ مرا دل ہی میرے بس میں نہ تھا
جو تو ملا تو میں خود اپنی دسترس میں نہ تھا
Yahi Nahi Keh Mera Dil Hi Mere Bas Main Na Tha
Jo Tu Mila Toh Main Khud Apni Dastras Mein Na Tha
بہ نام عہد رفاقت بھی ہم قدم نہ ہوا
یہ حوصلہ مرے معصوم ہم نفس میں نہ تھا

عجیب سحر کا عالم تھا اس کی قربت میں
وہ میرے پاس تھا اور میری دسترس میں نہ تھا

نجانے قافلۂ اہل دل پہ کیا گزری
یہ اضطراب کبھی نالۂ جرس میں نہ تھا

خبر تو ہوگی تجھے تیرے جاں نثاروں میں
کوئی تو تھا سر مقتل جو پیش و پس میں نہ تھا

سرورؔ اپنے چمن کی فضا ہے کیا کہیے
سکوت کا تو وہ عالم ہے جو قفس میں نہ تھا
سرورؔ بارہ بنکوی
Suror  Barahbankvi