Ghazal Ko Phir Saja Ke Sorat e Mahboob Laya Hon Suno Ahl e Sukhan Main Phir Naya Aslob Laya Hon
غزل کو پھر سجا کے صُورتِ محبوب لایا ہوں
سُنو اہلِ سُخن میں پھر نیا اسلُوب لایا ہوں
Ghazal Ko Phir Saja Ke Sorat e Mahboob Laya Hon
Suno Ahl e Sukhan Main Phir Naya Aslob Laya Hon
کہو، دستِ محبت سے ہر اِک در پر یہ دستک کیوں
کہا سب کے لیے میں پیار کا مکتُوب لایا ہوں
کہو، کیا داستاں لائے ہو دل والوں کی بستی سے
کہا اِک واقعہ میں آپ سے منسُوب لایا ہوں
کہو ، یہ جسم کِس کا، جان کِس کی، رُوح کِس کی ہے
کہا تیرے لیے سب کچھ مرے محبُوب لایا ہوں
کہو کیسے مٹا ڈالوں انا میں التجا کر کے
کہا، میں بھی تو لب پر عرضِ نامطلُوب لایا ہوں
کہو سارا جہاں کیسے تمہارے گھر کے باہر ہے
کہا، سب جس کے دیوانے ہیں، وہ محبُوب لایا ہوں
کہو، پنہاں کِیا ہے کیا دلِ پردہ نشیں ہم سے
کہا، وصلِ نہاں کی خواہشِ محجُوب لایا ہوں
کہو، ٹُوٹے ہوئے شیشے پہ شبنم کی نمی کیسی
کہا _ قلبِ شکستہ، دیدۂ مرطُوب لایا ہوں
کہو، غم لائے ہو کتنا محبت میں بچھڑنے کا
کہا __ بس یہ سمجھ لو گریۂ یعقُوب لایا ہوں
کہا، تکلیف لایا ہوں، نہیں ہے اِنتہا جس کی
کہا، میں بھی وہیں سے دامنِ ایوب لایا ہوں
کہا کیا لے کے آئے ہو جہانِ بیوفائی سے
کہا، اِک چشم حیراں، اِک دلِ مضرُوب لایا ہوں
کہو، تحفہ عدیم اشعار میں کیا لے کے آئے ہو
کہا، شعروں کی سُولی پر دلِ مصلُوب لایا ہوں
عدیم ہاشمی
Adeem Hashmi
Comments
Post a Comment