Mujh Sa Na Dy Zamany Ko Parwardegar Dil Aashita Dil , Farefta Dil Beqarar Dil

مجھ سا نہ دے زمانے کو پروردگار دل
آشفتہ دل، فریفتہ دل بیقرار دل
Mujh Sa Na Dy Zamany Ko Parwardegar Dil
Aashita Dil , Farefta Dil Beqarar Dil
ہر بار مانگتی ہیں نیا چشم یار دل
اک دل کے کس طرح سے بناؤں ہزار دل

یہ صید گاہ عشق ہے ٹھہرائیے نگاہ
صیاد مضطرب سے نہ ہو گا شکار دل

پوچھا جو اس نے طالب روز جزا ہے کون
نکلا مری زبان سے بے اختیار دل

کرتے ہو عہد وصل تو اتنا رہے خیال
پیمان سے زیادہ ہے ناپائیدار دل

تاثیر عشق یہ ہے ترے عہد حسن میں
مٹی کا بھی بنائیں تو ہو بیقرار دل

اس کی تلاش ہے کہ نظر آئے آرزو
ظالم نے روز چاک کیے ہیں ہزار دل

پہلے پہل کی چاہ کا کیجیے نہ امتحاں
آنا تو سیکھ لے ابھی دو چار بار دل

اے عندلیب تجھ کو لگے کب ہوائے عشق
کلیوں کی طرح تجھ میں نہ پھوٹے ہزار دل

اس نے کہا ہے صبر پڑے گا رقیب کا
لے اور بیقرار ہوا بیقرار دل

مشہور ہیں سکندر و جم کی نشانیاں
اے داغؔ چھوڑ جائیں گے ہم یادگار دل
مرزا داغؔ دہلوی
Mirza Dagh Dehlvi